សម្ព័ន្ធសហជីពកម្ពុជា
(CATU) បានដាក់លិខិតស្នើសុំឲ្យឯកឧត្តម
វង សូត រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ ដំឡើងប្រាក់ឈ្នួលរបស់កម្មករកម្មការិនីពី
៦១ដុល្លារ ទៅ ១៥០ដុល្លារក្នុងមួយៗ នៅបំណាច់ឆ្នាំ២០១២នេះ តាមរយៈលិខិតលេខ ០៨៥ សសក
ចុះថ្ងៃទី ១១ ខែធ្នូ ឆ្នាំ២០១២ ។ ដោយប្រាក់ខែគោល តែ ៦១ដុល្លារ មានការឃ្លាតគ្នាឆ្ងាយពីតម្លៃទំនិញនៅលើទីផ្សារនាពេលបច្ចុប្បន្ន
ដែលចេះតែឡើងថ្លៃខ្ពស់ទៅៗ ធ្វើឲ្យជីវភាពកម្មករកម្មការិនីប្រឈមការលំបាកយ៉ាងធ្ងន់ធ្ងរក្នុងការចំណាយលើថ្លៃទឹក
ថ្លៃភ្លើង ថ្លៃរថយន្តឈ្នួល ថ្លៃឈ្នួលផ្ទះ ថ្លៃម្ហូបអាហារ និងការចំណាយផ្សេងៗជាច្រើនទៀត
ដូចជាថ្លៃពិនិត្យសុខភាព ព្យាបាលជំងឺ ។ល។ ហើយក៏ជាបញ្ហាធ្វើឲ្យកម្មករកម្មការិនីថមថយកម្លាំង
ដួលសន្លប់ជាញឹកញាប់ មកពីការរហូបមិនបានគ្រប់គ្រាន់ ។
ដូច្នេះសូមឲ្យនិយោជកទាំងអស់
គិតគូយកចិត្តទុកដាក់ក្នុងការស្នើសុំដំឡើងប្រាក់ខែគោល ពី ៦១ ដុល្លារ
ទៅ ១៥០ដុល្លារក្នុងមួយៗ ជូនដល់កម្មករកម្មការិនី ដែលជាកំលាំងផលិតរបស់ខ្លួនផ្ទាល់
ជាជាងការចំណាយឥតប្រយោជន៍ទៅលើបញ្ហាផ្សេងៗ ។
ក្រោយពីដាក់លិខិតទៅរដ្ឋមន្រ្តីក្រសួងការងារ
មិនមានដំណោះស្រាយ សម្ព័ន្ធសហជីពបានដាក់លិខិតទៅសាលារាជធានីភ្នំពេញ ដើម្បីសុំធ្វើបាតុកម្មទាមទារ
ដោយដាក់ជាញត្តិ ជូនទៅនាយករដ្ឋមន្រ្តី និងជូនប្រធានរដ្ឋសភា ដើម្បីជួយដោះស្រាយ
។
នៅថ្ងៃទី ៣០
ខែធ្នូ ឆ្នាំ២០១២ បាតុកម្មបានប្រព្រឹត្តិទៅ ដោយមានកម្មករកម្មការិនីចូលរួមប្រមាណជាង
៣០០នាក់ ។
បន្ទាប់មកក៏មានការចេញនូវសេចក្តីប្រកាសព័ត៌មាន
លេខ ០០៧ កកទវ ចុះថ្ងៃទី ៣១ ខែធ្នូ ឆ្នាំ២០១២ ពីរដ្ឋមន្រ្តីក្រសួងសង្គមកិច្ច អតីតយុទ្ធជន
និងយុវនីតិសម្បទា និងជាប្រធានក្រុមការងារផ្នែកទំនាក់ទំនងវិជ្ជាជីវៈ ដោយឲ្យបងប្អូនកម្មកររក្សានូវស្ថិរភាពការងារ
រងចាំលទ្ធផលនៃការពិភាក្សាដោះស្រាយរវាងគ្រប់ភាគីពាក់ព័ន្ធ ។ រហូតមកដល់ពេលនេះ នៅមិនទាន់បានទទួលដំណោះស្រាយណាមួយនៅឡើយ
៕
